Bome: bladwisselende en immergroen

Bome Bome vervul nie net 'n belangrike rol as versiering nie, maar het 'n baie groot bydrae om die lug te suiwer. Hierdie bydrae is so belangrik dat organisasies wat stedelike ontwikkeling doen, deesdae ook groot "groen ruimtes" of parkgebiede ontwikkel en inruim in voorstedelike of woongebiede. Groot stede van die wêreld het dikwels ook mooi groot parke waar inwoners kan ontspan.	Groter weergawe

Bome wissel in grootte, en daar is bladwisselende en immergroen soorte. Sommige bome word 'n paar jaar oud maar ander kan honderd jaar of ouer word. Die jaarringe van bome kan help om die ouerdom van bome te bepaal. Bome se stamme wissel in breedte en sommiges soos die kremetartbome wat so baie in die Noord-Transvaal te siene is, is geweldige dik. Daar is ook bome wat tot oor die 300 voet hoog word. Bome skep eintlik maar 'n ekologie van hul eie, omdat hulle talle ander diere soos insekte, voëls en soogdiere soos primate, bokke, ens., van skuiling en woonplek voorsien. Die reënwoude bly van die mooiste en belangrikste dele in die wêreld en sulke gebiede behoort bewaar te word. Daar is soveel wonderlike spesies wat net in bepaalde woude en boomryke gebiede voorkom, dat die bewaring van daardie gebiede groter aandag behoort te geniet. Bome speel ook 'n baie groot rol by die bewaring van grond, omdat dit gronderosie help voorkom. Boere wat met vrugte 'n inkomste maak ken die belangrikheid van vrugtebome. Ons voedelselbronne word baie aangevul met boomvrugte soos appels, kersies, lemoene en ander sitrusvrugte, pere, appelkose, perskes, amandels en nog baie ander. Ons daaglikse etes sal baie saai wees sonder hierdie heerlike vrugte.

Groter weergawe

Die Bybel dui talle bome aan, bv. die boom van die lewe en die boom van die kennis van goed en kwaad wat in die tuin van Eden was (Sien Genesis 2 vers 9). In aansluiting daarby is daar die boom van die lewe waarvan Johannes in Openbaring skryf: "... weerskante van die rivier was die boom van die lewe wat twaalf maal vrugte dra en elke maand sy vrugte gee, en die blare van die boom is tot genesing van die nasies."

In Daniël 4 lees ons van koning Nebukadneser se droom oor 'n groot boom. Die Here Jesus het ook dikwels van bome gepraat om van sy gelykenisse beter te belig. So is daar 'n gelykenis van die vyeboom in Lukas 13:7. Jesus het ook by ander geleenthede van vyebome gepraat.

Sommige volke plant met die geboorte van 'n kindjie 'n boom om die gebeurtenis te herdenk.

Bome is pragtig as hulle hul bloeisels in die lente dra en in die herfs is die geel, roesbruin, rooi en purper blare van bladwisselende bome iets besonders om te sien. Wie kan ongeraak bly as die Jakarandas baldadig begin blom in die vroeglente, of as die populiere se eerste fyn blaartjies liggroen begin te bot? En wie geniet nie die heerlike reuk van sipresse en denne na 'n goeie bui reën nie? Wie wil nie graag die gekwetter en sang van voëls hoog uit boomtakke hoor nie en wie wil nie graag die vlinders en bye sien baljaar in die boomblomme nie? Mens kan inderdaad saam met die digter C. M. van den Heever die skoonheid van bome wat bot, besing.

Amandelboom, O Lentebruid,
hoe spierwit bars die blomme uit,
die takke weeg nou, vlok op vlok
met haelwit sterre toekapok !

Bome bly wonderlik en dit sal ons baat om meer bome te plant en ernstig te besin voordat daar summier met 'n byl gekap en vernietig word.